İdarəetmə Sistemləri İnstitutunun Elmi seminarı keçirilib

02.05.2024 / Tədbirlər

30 aprel 2024-cü il tarixində AR ETN İdarəetmə Sistemləri İnstitutunun (İSİ) Elmi seminarı keçirilib. İclasda İSİ-nin “Mürəkkəb dinamik sistemlərdə idarəetmə üsulları” laboratoriyasının aparıcı elmi işçisi, riyaziyyat üzrə fəlsəfə doktoru, dosent Rəşad Məstəliyev  “Qeyri xətti və kvazi xətti stoxastik Qursa-Darbu sistemləri ilə təsvir olunan optimal idarəetmə məsələlərində birinci və ikinci tərtib zəruri şərtlər” adlı mövzuda məruzə etmişdir.

Məruzəçi Rəşad Məstəliyev əvvəlcə qeyri-xətti stoxastik Qursa-Darbu sistemləri ilə təsvir olunan optimal idarəetmə məsələsində optimallıq üçün Pontryaginin maksimum prinsipi formasında birinci tərtib zəruri şərtin alınmasından bəhs etmişdir. O, daha sonra isə bu zəruri şərtin çırlaşdığı məxsusi halı tədqiq edərək  məxsusi idarələrin optimallığı üçün alınmış zəruri şərtlər haqqnda danışmışdır.

Məruzənin davamında Rəşad Məstəliyev kvazi-xətti Qursa-Darbu sistemli optimal idarəetmə məsələsində məxsusi halı tədqiq etmişdir. O, vurğulamışdır ki, bu halda məxsusi idarələrin optimallığı üçün indivudial zəruri şərtlər tapılmışdır. Belə ki, bu zəruri şərtlər ümümi halda alınmış zəruri şərtlərin nəticəsi olmayıb, ayrıca əhəmiyyət daşıyır.

Məruzə dinləyicilərin marağına səbəb olmuş, mövzu ətrafında suallar cavablandırılmışdır.